Cerbun Elly Dharmawanti
PAGI sai helau, Siti luar jak lambanni mit pingger lawok. Bingi seno terai kedok nihan. Pasti wai lawok ngusung lamon kayu-kayu basoh sai risok dikiangkoni, jadi jaruan. Di pingger lawok lamon bebai bareh sai radu ngumpulko kayu. Tian setaguan sambil bubalah pudak ni tian riang sambil bumain.
Siti ngaliak tian jak jaoh. Ya terok haga puson jama tian, ngerasa ko kesenangan sai wat, kindangni ya angkah mahengas kejung gawoh daleh lapah mik pingger lawok, sai sumang haguk. Ya ngesonko pampangni kayu basoh.
Ani Siti kehurekan ji mak wat adil, ya mawat parnah ngerasa adil uleh keluargani, rek lingkungan ni. Siti mirak jama kehurekanni adekni sai ruwa bebai, Laila rek Nur. Tian ruwa laher buyun. Tian ruwa masikop rek mapintarm, ani bakni. Paling mawek tian ruwa mapintar narek perhatian bakas lamon. Kaduni tian ruwa radu wat kajong di umor lagi mangura. Waktu seno Siti musakik hati rek hancor. Pulalegohan ruwa adikni ngelangkahi ya lom pernikahan. Kindang ya sabar. Ya muneh mawat haga parnah wat keluarga lunik sai manis injuk sai risok diangangonkoni.
"Mengapi nyakku laher bida Mak, mengapi nyak bida jak adik-adikku?" Siti bumiwang jama makni. Injuk biasani bebai tuha sedi angkah ngahema. Kadu tian ruwa miwang sanemon.
Ani Siti angkah makni sai ya ngedok di dunia sinji, angkah makni sai ngareti perasaanni, angkah makni sai ngejagani, rek nulung ya jak cawa-cawani jalma-jalma, kuk puarini ruwa sai bebai. "Pudak beruk, pudak beruk, pudak beruk usuk," cawa-cawa sai risok didengi cupingni.
Bakni ninggal radu ruwa tahun, Siti angkah tinggal jama makni tanggalan, ngegantungko nyawa tian ruwa jama sang petak sabah. Sedang ruwa puari bebaini tinggal di rang bareh barong anak-anak rek kajongni tian. Angkah pusesekali ratong nyilau kubu lunik sai radu ngebalakko rek nguyunko tian.
Kebuyaan ngepapiyoh, Siti pedom lelok di gelerni cukutni makni, wat luh kiang gugor jak tukuni matani bebai tuha sedi, culukni sai lemoh musau-musau buokni Siti pulalegohan. "Malang nihan nasibmu, Nak," cawani bebai sedi. Dua luar jak bangukni kidang mawat besuara.
***
SEMEKUNG subuh injuk biasani Siti radu minjak, busap di sumor kudanni lamban. Kadu ngehurekko tungku majak wai nyinjong mi rek gulai sepa ya riya. Emakni lagi pedom lelok lom piyuni, Siti ngelamun di hadapni tungku sai lagi hurek. Pedom jeno ya hanipi, ulai balak nihan ngikok badanni kuat ireh sampai ya mawat dacok mahengas. Kadu ya ngingok emakni pernah cerita kik hanipi di lingkor ulai tandani jodoh jelma sai hanipi ano adu maredik.
Cawani Siti, "Api mungkin." Kadu ya ngiwakko wai sai radu merunggak.
Injuk pagi-pagi sai bareh, Siti risok mik pantai, anggokni mawat lamon kayu basoh sai biasani tikumpulko. Ani mik pantai sai angkah bujarak sekirani ruwa ratus meter jak lamban, gegoh gawoh midor mik dunia bareh, dunia sai helau rek biasa ya rasako kak lagi tenggalan. Pantai mangi, Siti mejong di bah batangni pandan, mejong ngaliak lawok biru.
Ya cawa:
mati sakik hurikmu badan
selalu tiram dawah dabingi
nyak minjak pedom diguya hiwang
niku dilom hanipi
Mati rani mawat haga ngeliakko sinarni sampurna, Siti taru bulagu. Ya nuntong lawok jaoh, kenui kambor-kambor di atas, keliakan riang rek mahelau. Siti jadi iri rek terok ya jadi kenui kamedi, setumpak, uuupps, Siti jadi susah mahengas. Pamenokni makelom, injuk wat sai narek badanni mit kudan. Siti nyaraman bala ngaredik ya. Uluni radu di salok kayin warna alom jak kudan uleh tenaga sai kuat nihan. Wat culuk sai mulai nyating badanni sai bareh buusaha ngabukak paksa kawai sai dipakaini.
Siti ngalawan, ngalawan sekuat tenagani, sai injuk biasa, injuk wat sai ngayunni nyelamatko badanni Siti, ngacung, ngajulak, ngeroh, neting kanan kiri, mik hadap, mik kudan, mik angin, rek ya kepayahan mahengas. Banguk ni mawat dacok busuara, ya terok nihan mekik ngilu tulung, waktu ya lagi pusing rek masepul, setumpak--tap, ujung cukutni kena barang keras, injuk kayu, lansung ya mejong, ngakuk barang seno. Hip kena, ya teting pira kali jama jalma sai nyatingni. Kain sai nyalok uluni mulai magedor. Siti tambah semangat, neting mawat tantu gawoh, mik kiri mik kanan, hadap kudan sampai ya ngerasa mawat ngedok lagi tenaga sai nyating badan ni, Siti bebas, ya tegar kicok, mawat ngedok arah rek tujuan, tegar, tegar rek tegar.
Waktu cukutni mulai mabuya, ya ampai nyaraman kik ulu ni lagi disalok kain. Kesol ya narek barang seno. Matani ngicop ngaliyak kiri-kanan. Yya lagi wat di pingger lawok, kindang majaoh di rang bareh. Ya kebuyaan di henini lawok. Miwang sardedok di lawok, miwang sardedok. Matarani di atas edok, matarani di atas ulu ni, ya santai nguntaiko cukut mik lamban.
Tambah panas uluni, ya santai nguntai ko cukut mik lamban.
***
MARUYUHNI mak tambah parah, bebai sedi lagi pedom di pelang sai kicut, pas ngaliak Siti ngabukak rangok, ya ngeni sarat in maredik. Mak musau buwokni pulalegohan. Siti mulai miwang sardedok, jeno nimalegoh, kadu mulai mahatang. Siti mawat sanggup nyeritako kejadian sai dirasakoni. Culukni makni lagi musau ulu ni, palegoh, palegoh, malegoh tambah malegoh, rik akhirni taru nihan.
Radu baleju miwang, Siti ampai nyaraman culukni makni lagi di atas uluni, kidang mawat musau buwok injuk biasani sai biasa diguaikoni. Siti ngiwakko uluni ngaliyak makni, matani makni pedom, tenang. Siti ngerasako dadani bugetar, unyin sendi-sendini malemoh, minjak ya sibut ngagirok-girok badan raying sedi. Sambil ngurau-ngurau bebai sai ya cintai sedi. Ya pusau nadini, mawat ngedok denyut (ketok). Di redikkoni cuping mik dada mawat ngedok detak. Depikkoni jari culuk di ruwa lubang irungni, mawat ngdok hengas lagi. Siti malemoh rik miwang sanemon. Waktu nyaraman tanno ya benor-benor tanggalan. n
--------
Elly Darmawanti, nulis cerita buntak (cerbun) di pepira koran injuk Lampung Post. Tanno, basani nyiapko buku kumpulan cerbunni.
Lampung Post, Minggu, 30 September 2012
PAGI sai helau, Siti luar jak lambanni mit pingger lawok. Bingi seno terai kedok nihan. Pasti wai lawok ngusung lamon kayu-kayu basoh sai risok dikiangkoni, jadi jaruan. Di pingger lawok lamon bebai bareh sai radu ngumpulko kayu. Tian setaguan sambil bubalah pudak ni tian riang sambil bumain.
Siti ngaliak tian jak jaoh. Ya terok haga puson jama tian, ngerasa ko kesenangan sai wat, kindangni ya angkah mahengas kejung gawoh daleh lapah mik pingger lawok, sai sumang haguk. Ya ngesonko pampangni kayu basoh.
Ani Siti kehurekan ji mak wat adil, ya mawat parnah ngerasa adil uleh keluargani, rek lingkungan ni. Siti mirak jama kehurekanni adekni sai ruwa bebai, Laila rek Nur. Tian ruwa laher buyun. Tian ruwa masikop rek mapintarm, ani bakni. Paling mawek tian ruwa mapintar narek perhatian bakas lamon. Kaduni tian ruwa radu wat kajong di umor lagi mangura. Waktu seno Siti musakik hati rek hancor. Pulalegohan ruwa adikni ngelangkahi ya lom pernikahan. Kindang ya sabar. Ya muneh mawat haga parnah wat keluarga lunik sai manis injuk sai risok diangangonkoni.
"Mengapi nyakku laher bida Mak, mengapi nyak bida jak adik-adikku?" Siti bumiwang jama makni. Injuk biasani bebai tuha sedi angkah ngahema. Kadu tian ruwa miwang sanemon.
Ani Siti angkah makni sai ya ngedok di dunia sinji, angkah makni sai ngareti perasaanni, angkah makni sai ngejagani, rek nulung ya jak cawa-cawani jalma-jalma, kuk puarini ruwa sai bebai. "Pudak beruk, pudak beruk, pudak beruk usuk," cawa-cawa sai risok didengi cupingni.
Bakni ninggal radu ruwa tahun, Siti angkah tinggal jama makni tanggalan, ngegantungko nyawa tian ruwa jama sang petak sabah. Sedang ruwa puari bebaini tinggal di rang bareh barong anak-anak rek kajongni tian. Angkah pusesekali ratong nyilau kubu lunik sai radu ngebalakko rek nguyunko tian.
Kebuyaan ngepapiyoh, Siti pedom lelok di gelerni cukutni makni, wat luh kiang gugor jak tukuni matani bebai tuha sedi, culukni sai lemoh musau-musau buokni Siti pulalegohan. "Malang nihan nasibmu, Nak," cawani bebai sedi. Dua luar jak bangukni kidang mawat besuara.
***
SEMEKUNG subuh injuk biasani Siti radu minjak, busap di sumor kudanni lamban. Kadu ngehurekko tungku majak wai nyinjong mi rek gulai sepa ya riya. Emakni lagi pedom lelok lom piyuni, Siti ngelamun di hadapni tungku sai lagi hurek. Pedom jeno ya hanipi, ulai balak nihan ngikok badanni kuat ireh sampai ya mawat dacok mahengas. Kadu ya ngingok emakni pernah cerita kik hanipi di lingkor ulai tandani jodoh jelma sai hanipi ano adu maredik.
Cawani Siti, "Api mungkin." Kadu ya ngiwakko wai sai radu merunggak.
Injuk pagi-pagi sai bareh, Siti risok mik pantai, anggokni mawat lamon kayu basoh sai biasani tikumpulko. Ani mik pantai sai angkah bujarak sekirani ruwa ratus meter jak lamban, gegoh gawoh midor mik dunia bareh, dunia sai helau rek biasa ya rasako kak lagi tenggalan. Pantai mangi, Siti mejong di bah batangni pandan, mejong ngaliak lawok biru.
Ya cawa:
mati sakik hurikmu badan
selalu tiram dawah dabingi
nyak minjak pedom diguya hiwang
niku dilom hanipi
Mati rani mawat haga ngeliakko sinarni sampurna, Siti taru bulagu. Ya nuntong lawok jaoh, kenui kambor-kambor di atas, keliakan riang rek mahelau. Siti jadi iri rek terok ya jadi kenui kamedi, setumpak, uuupps, Siti jadi susah mahengas. Pamenokni makelom, injuk wat sai narek badanni mit kudan. Siti nyaraman bala ngaredik ya. Uluni radu di salok kayin warna alom jak kudan uleh tenaga sai kuat nihan. Wat culuk sai mulai nyating badanni sai bareh buusaha ngabukak paksa kawai sai dipakaini.
Siti ngalawan, ngalawan sekuat tenagani, sai injuk biasa, injuk wat sai ngayunni nyelamatko badanni Siti, ngacung, ngajulak, ngeroh, neting kanan kiri, mik hadap, mik kudan, mik angin, rek ya kepayahan mahengas. Banguk ni mawat dacok busuara, ya terok nihan mekik ngilu tulung, waktu ya lagi pusing rek masepul, setumpak--tap, ujung cukutni kena barang keras, injuk kayu, lansung ya mejong, ngakuk barang seno. Hip kena, ya teting pira kali jama jalma sai nyatingni. Kain sai nyalok uluni mulai magedor. Siti tambah semangat, neting mawat tantu gawoh, mik kiri mik kanan, hadap kudan sampai ya ngerasa mawat ngedok lagi tenaga sai nyating badan ni, Siti bebas, ya tegar kicok, mawat ngedok arah rek tujuan, tegar, tegar rek tegar.
Waktu cukutni mulai mabuya, ya ampai nyaraman kik ulu ni lagi disalok kain. Kesol ya narek barang seno. Matani ngicop ngaliyak kiri-kanan. Yya lagi wat di pingger lawok, kindang majaoh di rang bareh. Ya kebuyaan di henini lawok. Miwang sardedok di lawok, miwang sardedok. Matarani di atas edok, matarani di atas ulu ni, ya santai nguntaiko cukut mik lamban.
Tambah panas uluni, ya santai nguntai ko cukut mik lamban.
***
MARUYUHNI mak tambah parah, bebai sedi lagi pedom di pelang sai kicut, pas ngaliak Siti ngabukak rangok, ya ngeni sarat in maredik. Mak musau buwokni pulalegohan. Siti mulai miwang sardedok, jeno nimalegoh, kadu mulai mahatang. Siti mawat sanggup nyeritako kejadian sai dirasakoni. Culukni makni lagi musau ulu ni, palegoh, palegoh, malegoh tambah malegoh, rik akhirni taru nihan.
Radu baleju miwang, Siti ampai nyaraman culukni makni lagi di atas uluni, kidang mawat musau buwok injuk biasani sai biasa diguaikoni. Siti ngiwakko uluni ngaliyak makni, matani makni pedom, tenang. Siti ngerasako dadani bugetar, unyin sendi-sendini malemoh, minjak ya sibut ngagirok-girok badan raying sedi. Sambil ngurau-ngurau bebai sai ya cintai sedi. Ya pusau nadini, mawat ngedok denyut (ketok). Di redikkoni cuping mik dada mawat ngedok detak. Depikkoni jari culuk di ruwa lubang irungni, mawat ngdok hengas lagi. Siti malemoh rik miwang sanemon. Waktu nyaraman tanno ya benor-benor tanggalan. n
--------
Elly Darmawanti, nulis cerita buntak (cerbun) di pepira koran injuk Lampung Post. Tanno, basani nyiapko buku kumpulan cerbunni.
Lampung Post, Minggu, 30 September 2012
No comments:
Post a Comment